Madaxweyne ku xigeen Saylici oo Madaxtooyada ku Qaabilay Wariyayaal Ree Borama ah

 Madaxwayne Ku Xigeenka JSL Oo Madaxtooyada Ku Qaabilay Wafdi Suxufiyiin Reer Awdal Ah

Madaxwayne ku xigeenka Jamhuuriyada Somaliland Eng. Cabdiraxmaan Cabdilaahi Ismaaciil Saylici ayaa maanta xafiiskiisa ku qaabilay wafdi ka socday suxufiyiinta gobolka Awdal oo maalmahii u dambeeyay hawlo shaqo u joogay magaalada Hargaysa.

Wafdigan suxufiyiinta ah oo uu hogaaminayay Musharaxa Jagada Gudoomiye-nimo ee ururka Suxufiyiinta Somaliland ee Solja Eng. Maxamed Xasan Ismaaiil Sharbi-yare oo ay weheliyaan suxufi Maxamed Nuur Muuse Bilibili & Suxufiyad Fadxiya Yaasiin Buuni ayaa lagu qaabilay hab-maamuus uu maqaamkiisu aad u sareeyay.



Kulankan oo ahaa mid albaabadu u xidhan yihiin ayaa markii uu soo dhamaaday waxa warbaahinta uga waramay Suxufi & Musharax Eng. Maxamed Xasan Ismaaciil Sharbi-yare waxana uu hoosta ka xariiqay in uu ahaa kulan midho dhal ah.

“Aad ayaan Madaxwayne ku xigeenka Jamhuuriyada Somaliland Eng. Cabdiraxmaan Cabdilaahi Ismaaciil Saylici uga mahadcelinaynaa sida karaamada leh ee uu noo qaabilay, kulankaasina waxa uu ahaa mid is xogwaraysi u badnaa, waxna aan ka wada hadalnay sidii ka suxufiyiin ahaan aan u sii xoojin lahayn hawlaha dhinaca tabinta xogta togan ah ee u adeegaysa hormarka guud ee dalka, wacyigalinta ilaalinta amniga iyo nabada, iyo sidii dhalinta loogu jihayn lahaa ka qayb qaadashada hormarka dalka ka socda”

Isaga oo hadalka sii wata ayaa Suxufi Musharax Eng. Maxamed Sharbi-yare waxa uu hoosta ka xariiqay in aanay meesha ka maqnayn in ay ka wada hadleen xaalka guud ee gobolka Awdal iyo kan suxufiyiinta gobolka Awdal, waxana uu iftiimiyay in Madaxwayne ku xigeenka Jamhuuriyada Somaliland Eng. Cabdiraxmaan Cabdilaahi Ismaaciil Saylici iyo xukuumada xisbiga Kulmiye ay ka go’an tahay in ay wada shaqayn dhaw la yeeshaan suxufiyiinta gobolka Awdal, sidoo kale suxufiyiintana looga baahan yahay in ay kaalin masuuliyadeed ka qaatan wacyigalinta guud ee bulshada iyo sidii dhalinta gobolka Awdal loogu jihayn lahaa wadaniyada kaabaha u ah hormarka balaadhan ee gobolka Awdal ka socota.

Suxufi Musharax Eng. Maxamed Sharbi-yare ayaa sidoo kale u mahadnaqay Wasiirka Hormarinta Maalgashiga & Warshadaha Mudane Cabdi Cismaan Dhagawayne oo kaalin lixaad leh ka qaatay sidii kulankani u qabsoomi lahaa