Waa Kuma Xasan Cali Cismaan ' Siyaasi ku caan baxay Waxqabadka iyo u Adeegida Bulshada Awdal QORMO KA WARAMAYSA WAXQABADKIISA

Kadiye Media ( Boorama) Waa Kuma Xasan Cali Cismaan ' Siyaasi ku caan baxay Waxqabadka iyo u Adeegida Bulshada Awdal QORMO KA WARAMAYSA WAXQABADKIISA

Xasan Cali Cismaan wuxu ka mid ah shakhsiyaadkii lahaa hindisaha iyo yagleelka jaamacadda (Camuud) ugu faca iyo filka weyn dhulka Somalida ka dib burburkii dawladdii dhexe ee Jamahuuriyadda Somaaliya ee uu gadhwadeenka ka ahaa Jaale Maxamed Siyaad Barre. Shakhsiyaadkaan ayaa kala ahaa: Xasan Cali, Cabdisalan Ilburo, Saleemaan Walhad, Idiris Muxumad Sacad iyo Axmed Siciid Cismaan. Dhammaantood fadhigoodu wuxu ahaa Khaliijka Carabta walow ay waddamo ahaan kala duwanaayeen. Shakhsiyaadkan kor ku xusan ayaa la kaashaday shakhsiyaad kale oo markaa guda dalka joogay, Ilaahay mahaddii waa ay ku guulaysteen inay dhidibada u joojaan Jaamacadda Camuud. Waxana jaamacadda ka baxay kumannaan dhallinyaro u laylyan koobidda baahiyaha bulshada. Ardaydaan ka baxay Jaamacadda Camuud waxay ku baahsan yihiin dhammaan deegaamada geyiga Soomaaliyeed.

Xasan Cali wuxu mar kale qayb ka ahaa dhismaha jidka la mahadiyay ee isku xidha Boorama iyo Dila. Hay'ad magaceeda la odhan jiray ARNA oo u igmanayd dhismaha jidadka oo uu gudoomiye ka ahaa Cabdiraxmaab Maxamuud Muuse (Cabdi Quraab) ayaa markii dambe lagu wareejiyay oo looga dhigay hoggaan, balse waxa markii dambe loo beddalay magaceedii ASARDA. Xasan iyo kolanyo ka kooban qaybaha bulshada ayaa dhexda u xidhay sidii la iskugu xidhi lahaa Boorama iyo Hargaysa. Intaan la bilaabin dhismaha jidkan laamiga ah ee isku xidha Dila iyo Boorama waxa aad Hargaysa gaadhaysay adiga oo burbursan, balse hadda sidaan ka wada ogsoonnahay waa lagu reeyay. Jidkan ayaa waxa lagu dhisay qaadhaan laga ururiyay qaybaha bulshada oo dal iyo dibadba ahayd. Waxan xasuustaa markii dugsiyada iyo jaamacadaha ay marayeen Xasan iyo asxaabtii ku wehelinaysay dhismaha jidku hadaladdii ruxi jiray quluubta ardayda oo aanad garanay goor ay godladeen isla markaana si dhakhso ah ay u ballan qaadayeen qof walba hayntiisa. Gallad Eebbe weeyee jidkii maanta waa lagu caano-maalay.

Xasan Cali Cismaan waxa mar kale loo igmaday inuu maareeye ka noqdo Hay'adda Horumarinta Wadooyinka Somaliland. Hay'addan oo ay yarayd in la maqlaa markii hore ayuu baray bulshada Somaliland, magaceeduna wuxu gaadhay dal iyo dibad. Waxa lagu xasuusan doonaa xilli xafiiseedkiisa dhismaha jidka Ceerigaabo oo ahaa mid qaylo-dhaan cod dheer lagu baaqay si loo dhiso, waayo Ceerigaabo waxay ka go'antahay Somaliland inteeda kale oo maysan lahayn jid isku xidha. Sidoo kale, waxa lagu xasuustaa dhisma jidka Kala-baydh iyo Wajaale, Kala-baydh, dayactirka jidka Berbera iyo Dila iyo jidad kale oo aan halkan ku soo koobi karin. Dhammaan jidadkaas aan soo sheegay iyo qaar badan oo aanan xusin waa lagu diirsaday waana la mahadiyay.

Dhanka kale, Xasan Cali Cismaan waxa uu hadda u mindiyo lisanayaa dhismaha gegida diyaaraha ee Boorama taasi oo ay badan tahay baahida loo qabo isaga oo gadhwadeen ka ah hay'ad Magaceedu yahay Hay'adda Horumarinta Kaabayaasha Dhaqaalaha Gobollada Salal iyo Awdal loona soo gaabiyay (SAIDA).