Waar yaa yidhi Ciidanka Qaranka Somaliland waxa la asaasay 1994kii? Anigu waxan qabaa oo run ah in la asaasay markii ugu horeysay 1901dii…..Cali Guray

Waar yaa yidhi Ciidanka Qaranka Somaliland waxa la asaasay 1994kii? Anigu waxan qabaa oo run ah in la asaasay markii ugu horeysay 1901dii, ururkii ugu horeeyayna tababarkiisa dhamaystay bishii May ee isla sanadkaasi taliyena waxa u noqday nin Ingiriis ahaa oo la odhan jiray Captain Swayn. Bishii June 26dii 1960kii markii ay Somaliland madaxbanaanida heshay tirada ciidankaasi waxay gaadhay afar urur ama battalion oo 2000 ah. Ciidankaasi oo markii hore la odhan jiray Somali Scout wuxu noqday ciidan qaran 26 June 1960kii.

1dii bishii July markii ay Somalland israac aan shuruud lahayn kula midawday Somalia oo hal askari oo milatari ah lahayn Ciidankii Somaliland ayaa laga unkay Ciidankii Qaranka ee Xooga Dalka Somaliyeed. Markaa hadii la yidhaa Ciidanka Qaranka ee Somaliland waxa la asaasay 1994kii yay ahaayeen 2000 ee ciidanka Somaliland yaase looga tegayaa taariikhdoodii? Ma Somalia oon lahayn hal askari ayaa taariikhda ciidankii Somaliland looga tegayaa? Astaamaha Ciidanka Xooga Dalka Soomaaliyeed labada waran iyo gaashaanka waxay ka dhaxleen Somaliland Scout ee noqday Ciidankii Qaranka Somaliland markii ingiriisku tegay.Isteelaha ama xidigta kaladhadana waa biladii NUF. Wax ay iyagu lahaayeenba ma jiro. Markaa xaalku ma sidan ayuu sax ku yahay oo waxaynu taariikhda Ciidanka Qaranka ka bilawnaa 94kii mise in dib wax loo eego ayaa haboon?

Cali Maxamed Yuusuf (Cali Guray)