Munaasabad aad u balaaran oo lagu dhaariyey islamarkaana ay xilka si toos ah ula wareegeen duqa magaalada Minneapolis iyo gudoomiyayaasha degmooyinka ayaa ka dhacday xarunta madaxtooyada magaaladaasi. Munaasabadaan ayaa waxaa kasoo qayb galay madaxda ugu saraysa gobolka iyo dalka Mareekanka, siyaasiyiin, culumo, iyo waliba jaaliyada balaaran ee Somaaliyeed oo si weyn uga muuqatay.
Somaalida ku dhaqan Minneapolis ayaa soo buux dhaafiyey madasha, iyagoo muujiyey shucuur qiiraysan kana tarjumaysa taagerida ay u hayaan gudoomiyihii u horeeyey degmo oo kasoo jeeda qowmiyada Somaalida. Waxaa goobtaasi lagu dhaariyey Maayarka cusub ee magaalada Minneapolis marwo Betsy Hodges iyo gudoomiyayaasha degmooyinka magaalada Minneapolis.
Abdi Warsame oo ah shaqsigii u horeeyey Muslim oo noqdo gudoomiya degmo ayaa goobtaasi ka dhexmuuqday, isagoo ku labisan Shaal iyo Koofiyad Somaali. Culumaa’udiinka gobolka oo marti qaad ka helay Abdi Warsame ayaa sidoo kale ka muuqday safka hore ee munaasabadaasi, iyagoona muujiyey kalsooni iyo farxad aan abid horay loo arag.
Abdi Warsame oo la hadlay saxaafada Somaalida iyo kuwa caalamiga ah ee dalka Mareekanka ayaa u mahadnaqay dadwaynaha doortay islamarkaana sharaxay agendahiisi 4ta sano soo socoto. “Amaanka, hormarinta degaanka iyo shaqo abuuris ayaa ahmiyadeedi koowaad ah,” ayuu yiri Abdi Warsame xilli uu u waramaayey saxaafada.
Sheikh C/qani Qardhawi oo kamid ah culumaa’udiinka ugu waa’weyn magaalada Minneapolis oo la hadlay saxaafada ayaa yiri; “labiska Abdi Warsame uu munaasabadasi u xirtay ayaa fariin u diraysa siyaasiyiinta Somaalida inay maqaam sare gaari karaan iyagoo aan ka tagayn dhaqankooda.”
Munaasabadaasi ayaa kusoo gebagabowday jawi wanaagsan. Gudoomiyayaasha degmooyinka Minneapolis ayaa isla maanta u fadhiistay kala fadhigii u horeeyey sanadkaan 2014, iyagoona u doortay madaxweyne, marwo Barb Johnson.
Comments
Post a Comment
Fadlan Fikirkaaga ka dhiibo hadii aad ku xidhan tahay wararka iyo macluumaadka aanu halkan idinkula wadaagno noona reeb wixii talo iyo tusaale ah