Xisbiga Mucaaradka WADDANI Oo Xukuumada Axmed Siilaanyo Ku Eedeeyay In Ay Ku Fashilantay Siyaasadii Arimaha Dibeda Mudadii 3-da Sanno Ahayd Ee Ay Xilka Haysay..

Hargeysa-(ATN)-Xisbiga Mucaaradka ah ee Waddani, ayaa xukuumadda ku eedeeyay inay ku fashilantay siyaasadda arrimaha dibadda mudadii saddexda sanadood ahayd ee talada dalka haysay.

Masuuliyiin ka mid ah xisbiga Waddani oo maanta shir jaraa’id ku qabtay Hargeysa, ayaa sheegay in weftiga Somaliland uga qayb-galaya wadahadallada Soomaaliya ay Magaalada Addis-ababa ku qaateen siminaar ku saabsan nidaamka Federaalka.

Xoghayaha arrimaha gaarka ah ee xisbiga WADDANI, Xuseen Asad, oo ugu horeyn halkaasi ka hadlay ayaa yidhi “Xukuumaddu siyaasadda arrimaha dibadda way ku hafatay saddexdii sanadood, wayna jihayn kari wayday siyaasadda arrimaha dibadda, xukuumaddu way tagtay wadahadallada Soomaaliya, waynu ognahay meeqaamkii qaranimo ee Somaliland caalamka ku lahayd, taladii gooni isku taaga Somaliland hoos dhac-baa ku yimid intii xukuumaddani talada haysay. Waad ogeydeen dhawaan in dawladda Soomaaliya ay ka soo yeedhay in aanay Somaliland la hadlayn ilaa inta Somaliland ku taagan tahay majaraheeda gooni isku taaggeeda ilaa ay ka tanaasulaan, oo ay noqdaan maamul gobolleed. Xukuumaddeenu waxay kaga jawaabtay telefoon ayaanu kula xidhiidhnay Madaxwaynaha Soomaaliya oo dib baa lanoogu dhigay, waayo iyagaa degdegaya” ayuu yidhi Mr Xuseen Asad.

Xuseen Asad, waxa kale oo uu sheegay “Waxaanu ognahay in weftigii xukuumadda uga qayb-galayey wadahadalladu ay Addis-ababa ku qaateen siminaar ku saabsan federaalka oo ay qaateen nidaamka federaalka loo hirgalinayo” ayuu yidhi, waxaanu intaasi ku daray “Waxaanu ku talinaynaa in xeerkii fasaxayey wadahadallada Soomaaliya la laalo oo lagu celiyo halkii Daahir Rayaale kaga tagay”
Waxa iyaguna halkaas ka hadlay xoghaya qorshaynta xisbiga WADDANI, Eng. Cabdirashiid Riyo Raac iyo xoghayaha Warfaafinta xisbiga WADDANI, Maxamed Xasan Dirir,kuwaasi oo iyaguna dhinacooda iftiimiyey xaaladaha kala duwan ee ka taagan dalka,gaar ahaan biyo yaraanta ka taagan magalada Caasiamda Somaliland ee Hargeysa oo ah wax aan indhaha laga qarsan karahayn,xukuumadda Silanyo-na ku eedeeyay in anay isku hawlin sidii ay shacabka Hargeysi u heli lahaayeen biyo.”