Al-Bashir oo gaaray Juba, South Sudan

Madaxweynaha Sudan Cumar Al-Bashir ayaa gaaray magalada Juba ee caasimadda South Sudan si uu wadahadal ula yeesho dhigiisa Salva Kiir Mayardit.

Sudan ayaa ka walwalsan dagaalka ka socda South Sudan, iyadoo xiriir dhanka dhaqaalaha ah uu u dhexeeyo labada dal.

Wadahadallo fool ka fool ah

Dagaal xoogan ayaa ka dhacay duleedka magaalada Bor, caasimadda gobolka Jonglei ee istaraatiijiga ah.Booqashada Bashir ayaa imaanayso iyadoo saacado yar kaddib la filayo in wadahadallo fool ka fool ah ay dhexmaraan wafdiyada ka socda labada dhinac.

Magaalada Bor

Ciidamada dowladda ee isku dayayo in ay la wareegaan gacan ku haynta magaaladaasi ayaa weerar gaadmo ah lagu qaaday, waxaana halkaasi looga dilay Jeneraalkii hoggaaminayay.

Madaxweynaha Sudan Cumar Al-Bashir ayaa la filayaa inuu gaaro Juba

Magaalada Bor ayaa waxaa gacanta ku haya fallaagada taabacsan Madaxweyne kuxigeenkii hore ee dalkaasi Riyek Machar.

Ciidammada SPLA ayaa kala qeybsan iyadoo qaar ay taageersan yihiin Riek Machar

Dagaalka ka socda South Sudan ayaa waxaa barbar socda dadaallo nabadeed oo gaabis ah kuwaasi oo ka socda caasimada Itoobiya ee Addis Ababa.

Dhul dheeraad ah

Wadahadallada labada dhinac loo kala dab qaadayay ayaa qabsoomay, balse waxaan si rasmi ah weli u bilaaban wadaxaajood fool ka fool ah oo ay labada dhinac yeeshaan.

Waxaa muuqato in dhinac kasta uu isku dayayo in dhul dheeraad ah qabsado ka hor inta aysan xabad joojin dhicin.