Maayarka Magaalada Boorama Md.Saleebaan Xasan Xaddi Oo Ka Hadlay Arimo Muhiim Ah Oo Ay Dadwaynuhu Su’aalo Badan Iska Waydiinayeen Maalmihii U Danbeeyay

Borama-(Nuux kadiye)-Maayarka Boorama Md. Saleebaan Xasan Xadi ayaa maanta u waramay warbaahinta maxaliga ah, waxana uu ka war bixiyay dhawr arimood oo ay dadwaynahu doonayeen in ay dawlada Hoose ee Boorama kala
iftiimiso.

Maayar Saleebaan ayaa waxa uu ka dhawaajiyay halka ay ku dambeeyeen qorshayaashii dhismaha wadooyinka Sh. Cali Jawhar ee laamiga laga dhigayay iyo dhismaha biriijka xaafada Sh. Cismaan oo ah mid baahi wayn loo qabo, waxana uu yidhi “Waa Alle mahadii oo maanta ayaan saxeexnay hishiiskii dhismaha xaafada Sh. Cali Jawhar oo laami laga dhisayo, waxana uu laamigaasi ku dhismayaa iskaashiga Dawlada iyo Dadka xaafada, sidoo kale waxa aan sheegayaa in aan wadno qarshaynta dhismaha biriijka xaafada Sh. Cisman oo aan ku wadno inuu noqdo biriijka ugu wayn magaalada, dhamaan dhismayaashaas oo dhan waxaan ku talo galsanahay inaan bilawno horaanta sanadka soo socda ee 20134”

Maayar Saleebaan waxa uu ka hadlay cashuuraha iyo hadalka tirada badan ee dhaliisha u badan ee ka soo yeedhaya dadwaynaha, kaasi oo sheegaya in shaqaalaha cashuuraha ee D/Hoose ay xaafado badan oo lacagta cashuurta ah bixiyay ay hadana mar labaad ka soo furteen albaabada waxana uu yidhi “Wax walba oo la wadaa waa dib u sixid iyo kordhin dakhli, ma jirto cid laba goor cashuur laga qaaday, waxa arinta qaloocinaya waa koox tiro yar oo cashuurta la dhuudhuumata oo aan go’aansanay inaan dibada oo dhigno oo aan ka qaadno cashuurta waajibka ah, sidaas aawadeed waxa aan dadwaynaha u sheegayaa in cashuurtu ay waajib tahay oo loo baahan yahay inuu qof walba bixiyo.