Taliyaha Cusub Ee Ciidamada AMISOM Oo Xilka La Wareegay kadib Munaasabad ka dhacday Xalane

Nuux kadiye------Muqdisho ------Munaasabad ay xilalka ku kala waregayeen Taliyihii hore ee ciidamada Nabad ilaalinta Midowga Afrika ee AMISOM iyo kan cusub ayna ka qeyb galeen mas’uuliyiin ay ka mid ahaayeen Wasiirada difaaca dalalka Soomaaliya iyo Brundi, Saraakiisha
AMISOM qeybahooda kala duwan, madax ka socotay Midowga Yurub, Safiiro iyo marti sharaf kale ayaa maanta lagu qabtay xarunta xalane ee magaaladda Muqdisho.

Goobta munaasbadda ay ka dhacday ayaa ka qeyb galayaasha waxa ay kasoo jeediyeen qudbado la xiriiray wax qabadka Taliskii hore ee AMISOM iyo sida ay uga qeyb qaateen sugida amniga dalka, kuwaasi oo ay ka mid ahaayeen dib ula wareegid qaar ka mid ah gobollada dalka oo ay horey ugu sugnaayeen kooxda Al shabaab.

Taliyihii hore ciidamada Nabad ilaalinta Midowga Afrika ee AMISOM Jeneraal Andrew Gutti ayaa sheegay in mudada uu xilka hayay waxyaabo badan ay ka qabten arrimaha amniga dalka islamarkaana gaba gabo uu marayo howlgalka lagu cirib tirayo kooxaha argagaxisada ah ee Al shabaab ee ku dhuumaaleysanayay deegaano yar oo ka tirsan gobollada dalka

Taliyaha cusub ee ciidanka Amisom ee maanta xilka la wareegay Jeneraal Silas Ntigurirwa ayaa u mahadceliyay Taliyihii hore iyo howsha uu ka qabtay nabad kusoo celinta dalka, isagoo xusay in dhankiisa uu halkaasi ka sii wadi doono si loo soo afjaro howlgalka ka dhanka ah kooxda xagjirka ah ee Al shabaab.

Ergayga gaarka ah ee Midowga Afrika u qaabilsan arrimaha Soomaaliya Maxamed Salax Annadif ayaa ku ammaanay Taliyhii hore ee ciidamda AMISOM howshii uu hayay, isagoo taliyaha cusub ku booriyay in uu sii dar dar geliyo howsha AMISOM ay Soomaaliya ka heyso, ayna la shaqeeyaan saraakiisha kale ee ciidamada AMISOM ka tirsan.

Wakiilka Xogahayha guud ee Qaramada Midoobay u qaabilsan arrimaha Soomaaliya Neckolas Kay ayaa sheegay in howlgalka AMISOM ee ka socda Soomaaliya uu u horseeday dalka in wadadii nabada uu cagta saaro, loona baahanyahay in la sii labo jibaaro howlgalka AMISOM ee Soomaaliya.

Ugu dambeyn Wasiirka Difaaca Soomaaliya Mudane C/xakiin Xaaji Maxamuud Fiqi ayaa u mahad celiyay ciidamada AMISOM howsha ay ka hayaan dalka, islamarkaana shacabka Soomaaliyeed iyo dowladuba ay abaal weyn u hayaan gurmadka ciidamada AMISOM ay ka geystaan dalka

“Runtii taariikhda ayaa xusi doonta AMISOM howlaha muhiimka ee ay dalka ka wadaan, anaguna waan soo dhaweyneynaa taliyaha cusub ee maanta xilka la wareegay, diyaar ayaanna u nahay in aan la shaqeeno” ayuu Wasiirka gaashaandhigga ee Soomaaliya hadalkiisa ku daray.

Waa taliyihii afaraad ee loo magacaabo howlgalka AMISOM tan iyo markii ay dalka yimaadeen ciidamada AMISOM sanadkii 2007, waxaana taliyahan cusub uu noqonayaa kii ugu horeeyay oo u dhashay dalka Burundi oo qabta xilka AMISOM ee Soomaaliya.